Ársfundur Sjálfbærniverkefnisins á Austurlandi:

Ársfundur Sjálfbærniverkefnisins á Austurlandi verður haldinn þann 7. maí næstkomandi. Verkefnið er einstakt á heimsvísu og hefur verið starfrækt að frumkvæði Alcoa og Landsvirkjunar frá árinu 2004 í þeim tilgangi að fylgjast með áhrifum virkjunar og álversins á Reyðarfirði á samfélag, umhverfi og efnahag á Austurlandi.

Mikill fróðleikur er fólginn í þeim upplýsingum sem liggja nú fyrir í verkefninu en sem dæmi er búið safna ýmis konar upplýsingum um fjölda og samsetningu íbúa Austurlands, vinnumarkaðinn, samgöngur, loftgæði, lífríki, ferðaþjónustu og fjárhag sveitarfélaga svo eitthvað sé nefnt en áhugasamir geta kynnt sér upplýsingarnar á heimasíðu verkefnisins www.sjalfbaerni.is

Austurbrú tók við hlutverki framkvæmdaaðila af Þekkingarneti Þingeyinga um sl. áramót sem þýddi að vinna við verkefnið m.a. gagnaöflun, úrvinnsla, kynning og fleira færðist til Austurbrúar. Eitt megin tilefni ársfundarins er að fara yfir þær breytingar sem hafa orðið undangengið ár á þeim vísum sem fylgst er með og munu sérfræðingar frá Alcoa-Fjarðaáli, Landsvirkjun og Austurbrú fara yfir helstu niðurstöður mælinga 2012. Í framhaldinu fer fram hópavinna þar sem verkefnið verður rætt á breiðum grundvelli.

Ársfundurinn verður haldinn í Fróðleiksmolanum, Búðareyri 1 á Reyðarfirði. Fundurinn hefst kl 13:00 og er opinn öllum og ástæða til hvetja alla áhugasama til að mæta og fræðast um framvindu og niðurstöður. Fjölmiðlafólk er sérstaklega hvatt til að mæta enda verður fjallað um fjölmarga mælikvarða á samfélag umhverfi og efnahag fjórðungsins. Fundarstjóri verður Páll Björgvin Guðmundsson, bæjarstjóri í Fjarðabyggð.

Nánari upplýsingar og skráning á vef verkefnisins www.sjalfbaerni.is

Dagana 29. og 30. apríl mun Austurbrú standa fyrir erindum um staðbundið veðurfar á Suðausturlandi. Fyrirlesari er Kristín Hermannsdóttir veðurfræðingur, en hún hefur unnið sem veðurfræðingur á Veðurstofu Íslands síðastliðin 12 ár.

Fyrri fyrirlesturinn verður haldinn í Nýheimum á Hornafirði. Þar verður farið í einkenni veðurlags á Suðausturlandi og einkum við Hornafjörð. Rakið hver áhrif fjalla og jökla eru á hita, vind, úrkomu og snjóalög. Auk þess verður skoðað hversu mikil áhrif sjórinn og sjávarhitinn hefur á veðurfar. Síðast en ekki síst verður fjallað um hvaða gagn má hafa af veðurspám og hvernig þekking fólks á staðbundnu veðri getur aukið gagnsemi þeirra.

Seinni fyrirlesturinn verður í Löngubúð á Djúpavogi. Efnistök verða svipuð en sjónum þá meira beint að veðri nærri Djúpavogi.

Sem fyrr segir er það Austurbrú sem stendur fyrir heimsókn Kristínar en verkefnið er styrkt af Skinney-Þinganesi, Félagi smábátaeigenda á Austurlandi og AFLi Starfsgreinafélagi.

Staður og tími:

• Höfn Hornafirði - Nýheimar, 29. apríl (mánudagur) frá 20:00 til 22:00.
• Djúpivogur – Langabúð, 30. apríl (þriðjudagur) frá 20:00 til 22:00.

Ókeypis er á báða fyrirlestra.

Mennta- og menningarmálaráðuneyti, atvinnu- og nýsköpunarráðuneyti, Samband íslenskra sveitarfélaga, og Menningarráð Suðurlands í samstarfi við önnur menningarráð landsbyggðarinnar boðuðu til ráðstefnunnar Menningarlandið 2013 – framkvæmd og framtíð menningarsamninga, á Icelandair Hótel Klaustri dagana 11. og 12. apríl 2013. Meðal annars var Skúli Björn Gunnarsson með erindið Austurbrú reynsla og framtíðarsýn. Góð mæting var á ráðstefnuna  eða 107 manns víða af landinu og þar af tíu frá Austurlandi. Öll erindi ráðstefnunnar voru tekin upp og má sjá þau á tenglunum hér að neðan og má telja að sé áhugavert bæði fyrir sveitarstjórnarmenn og alla sem hefa áhuga á listum og menningu til samfélagsþróunar og þátt til að efla búsetu sem víðast á landinu að hlusta á erindin.

 http://www.samband.is/menningarlandid2013/menningarlandid-2013-dagskra/