Laugardaginn 16. mars verður Tæknidagur fjölskyldunnar haldinn í Verkmenntaskóla Austurlands. Tilgangur hans er að vekja athygli á tæknigreinum, vísindum og iðnaði í okkar nánasta umhverfi.

Tæknidagur fjölskyldunnar er liður í verkefni sem snýr að eflingu menntasamfélags í Fjarðabyggð. Háskólinn í Reykjavík stýrir verkefninu en það hlaut styrk frá Samfélagssjóði Alcoa í apríl 2011 og voru styrkþegarnir auk HR, Þekkingarnet Austurlands (nú Austurbrú) og Verkmenntaskóli Austurlands (VA). Tæknidagurinn er einungis einn liður þessa verkefnis en styrkurinn hefur verið nýttur til að veita nýnemastyrki til nema í málm- og rafiðnanámi VA og til endurmenntunnar kennara svo eitthvað sé nefnt. Hluti Austurbrúar hefur fyrst og fremst verið nýttur til að auka þjónustu við nemendur í frumgreinanámi sem er undirbúningsnám fyrir háskóla hafi fólk ekki lokið stúdentsprófi.

Á Tæknideginum taka leikskólar, skólar og fyrirtæki í Fjarðabyggð höndum saman um að sýna skemmtilegar tæknilausnir og framkvæma ýmsar tilraunir. Sem dæmi má nefna „öruggt hættusvæði“, hvísldiska og hvernig leikskólabörn leysa vandamálin. Þessir viðburðir og aðrir munu sýna mátt tækninnar og vísindanna og hversu spennandi þessi starfsvettvangur getur verið.

Hér er hægt að sækja yfirlit yfir viðburði tæknidagsins.