1. gr.
Sjóðurinn nefnist Atvinnuþróunarsjóður Austurlands og er heimili hans og varnarþing á Austur-Héraði.
2. gr.
Tilgangur sjóðsins er að stuðla að þróun og eflingu atvinnulífs á Austurlandi.
3. gr.
Tilgangi sínum hyggst sjóðurinn ná með:
a) Kaupum á hlutafé í nýjum fyrirtækjum sem stofnuð eru til að hafa með höndum starfsemi sem telja má til nýsköpunar í atvinnulífi á Austurlandi. Með nýjum fyrirtækjum er átt við fyrirtæki sem starfað hafa í skemmri tíma en tvö ár.
b) Lánveitingum vegna: Reksturs nýrra fyrirtækja á þróunartíma þeirra sem miða skal við að sé þrjú ár frá stofndegi.
Vöruþróunarverkefna starfandi fyrirtækja.
Markaðssetningar á nýjum vörum og markaðsaðgerða sem miða að því að afla nýrra markaða fyrir austfirskar vörur og þjónustu.
Öflunar á sérþekkingu sem nauðsynleg er vegna nýrrar starfsemi hjá fyrirtækjum.
c) Úthlutun styrkja vegna:
Sérfræðivinnu, sérstakra athugana, rannsókna og annarrar upplýsingaöflunar sem ætlað er að nýta við kannanir á grundvelli fyrir nýjungum í atvinnustarfsemi á Austurlandi.
Sérstakra verkefna eða starfsemi á sviði atvinnuþróunar og markaðs-, fræðslu- og upplýsingamála sem ná yfir stóran hluta af Austurlandi og ætla má að gagnist umtalsverðum fjölda fyrirtækja.
Stjórn sjóðsins ákveður hvort sjóðurinn nýtir sér alla ofangreinda möguleika eða afmarkar sig við þá sem taldir eru nýtast atvinnulífinu best hverju sinni. Nánari afmörkun skal koma fram í vinnureglum eða samþykktum stjórnar.
Fyrirgreiðsla úr sjóðnum skal að jafnaði háð því að umsækjendur séu með starfsemi í aðildarsveitarfélögum sjóðsins og séu skuldlausir félagar í Þróunarfélagi Austurlands. Sjóðsstjórn er þó heimilt að víkja frá þessu skilyrði þegar það þykir ekki eiga við.
4. gr.
Rétt til að gerast aðilar að Atvinnuþróunarsjóði Austurlands eiga sveitarfélög á Austurlandi. Austurland merkir í reglum þessum Austurlandskjördæmi.
5. gr.
Tekjur sjóðsins eru þessar:
a) Árlegt framlag aðildarsveitarfélaga skal nema 510,- krónum á hvern íbúa og er upphæðin miðuð við verðlag í janúar 1994. Eftir það skal framreikna upphæðina í byrjun hvers reikningsárs sjóðsins í samræmi við breytingar á lánskjaravísitölu. Miða skal við skráðan íbúafjölda í lok liðins árs þegar framlög eru reiknuð út.
b) Lántökugjald og vextir.
c) Aðrar tekjur.
6. gr.
Sjóðurinn er í vörslu stjórnar Atvinnuþróunarsjóðs Austurlands sem sér um ávöxtun hans á sem hagkvæmastan hátt. Reikningsár sjóðsins er almanaksárið.
7. gr.
Aðalfundur hefur æðsta vald í málefnum sjóðsins, skal hann haldinn fyrir lok maí ár hvert. Til hans skal boða með auglýsingum í blöðum eða á annan tryggilegan hátt með 10 daga fyrirvara hið skemmsta. Er hann þá lögmætur.
8. gr.
Á aðalfundi skulu tekin fyrir þessi mál:
1) Skýrsla stjórnar um starfsem hans s.l. starfsár.
2) Sjóðsstjórn leggur fram til afgreiðslu endurskoðaða reikninga sjóðsins.
3) Kosning stjórnar og varastjórnar.
4) Kosning tveggja skoðunarmanna og tveggja til vara.
5) Önnur mál.
9. gr.
Formaður eða varaformaður sjóðsstjórnar skal setja aðalfundi og stjórna þeim eða tilnefna fundarstjóra. Fundarstjóri tilnefnir fundarritara sem heldur fundar-gerðarbók.
10. gr.
Á aðalfundi ræðst atkvæðisréttur sveitarfélaga af fjárhæð framlaga þeirra, þó fari enginn með meira en 1/7 heildaratkvæðamagns. Ef tillaga fær jafnmörg atkvæði með og á móti telst hún fallin. Fái tveir menn eða fleiri jafnmörg atkvæði þegar kjósa skal menn til starfa fyrir sjóðinn, skal hlutkesti ráða.
11. gr.
Lögum sjóðsins verður aðeins breytt á aðalfundi. Í fundarboði skal þess getið sérstaklega að tillaga til lagabreytinga verði tekin til meðferðar á fundinum og skal efni hennar lýst. Tillaga til breytingar á lögum sjóðsins telst samþykkt ef hún fær 3/4 greiddra atkvæða.
12. gr.
Stjórn sjóðsins skal skipuð níu mönnum og jafnmörgum til vara og er hún kosin til eins árs í senn. Skal vera einn stjórnarmaður frá hverju þjónustusvæði sveitarfélaga á Austurlandi skv. lögum S.S.A. og formaður Atvinnuþróunarfélags Austurlands. Stjórnin skiptir með sér störfum.
13. gr.
Stjórn sjóðsins kýs sér þriggja manna framkvæmdaráð sem starfar í umboði stjórnar milli þess sem stjórnarfundir eru haldnir. Skal formaður stjórnar vera sjálfkjörinn í ráðið og jafnframt formaður þess.
14.gr.
Formaður eða varaformaður í forföllum hans boðar til stjórnar- og framkvæmdaráðsfunda og kveður varamenn til fundar ef aðalmaður sækir ekki fund. Skylt er að boða til stjórnarfundar ef þrír stjórnarmenn krefjast þess.
15. gr.
Stjórnin skal að jafnaði halda 2-4 fundi á ári þar sem úthlutað er úr sjóðnum. Stjórninni er þó heimilt að fela framkvæmdaráð að annast afgreiðslu á umsóknum í sjóðinn. Sjái framkvæmdaráð um úthlutanir skal ráðið gera stjórn grein fyrir umsóknum og úthlutunum á næsta stjórnarfundi eftir úthlutun. Auglýsa skal eftir umsóknum í sjóðinn fyrir úthlutunarfundi stjórnar eða framkvæmdaráðs.
16. gr.
Stjórn sjóðsins ræður málefnum hans með þeim takmörkunum er reglur þessar setja. Stjórnin ber ábyrgð á fjárreiðum sjóðsins. Hún skuldbindur sjóðinn gagnvart öðrum aðilum.
17. gr.
Stjórnar- og framkvæmdaráðsfundi skal boða með tryggilegum hætti og að lágmarki 7 daga fyrirvara. Stjórnarfundur er ályktunarbær ef meirihluti stjórnarmanna situr fundinn. Afl atkvæða ræður úrslitum á stjórnarfundi. Ef atkvæði eru jöfn ræður atkvæði formanns eða varaformanns í forföllum hans úrslitum. Gerðir stjórnar skulu bókfærðar.
18. gr.
Reikningar sjóðsins skulu endurskoðaðir af löggiltum endurskoðendum.
19. gr.
Þróunarfélagi Austurlands skal falið að sjá um daglegan rekstur sjóðsins í samræmi við reglur hans, ákvarðanir stjórnar og samþykktir aðalfunda. Sjóðsstjórn skal semja við Þróunarfélagið um þóknun fyrir veitta þjónustu við rekstur sjóðsins.
20. gr.
Stjórn sjóðsins ákveður þóknun fyrir stjórnarstörf, ef ástæða þykir til, svo og þóknun fyrir önnur störf.
21. gr.
Nú kemur fram tillaga um að leggja skuli sjóðinn niður. Telst hún ekki samþykkt nema 3/4 hlutar sjóðsfélaga séu mættir á aðalfundinn og hún fái 2/3 hluta greiddra atkvæða.
22. gr.
Segi sveitarfélag sig úr sjóðnum, á það ekki endurkröfurétt á greiddum framlögum sínum til sjóðsins.
