Markaðsstofa Austurlands - Austurbrú
Markaðsstofa Austurlands var stofnuð 7. febrúar 1999 af sveitarfélögum á Austurlandi og ferðaþjónustuaðilum. Starfssvæðið nær frá Vopnafirði í norðri til Djúpavogshrepps í suðri, auk þess nær svæðið til hálendisins norðan Vatnajökuls og Möðrudals. Henni er ætlað að kynna og markaðssetja Austurland sem eina heild. Markaðsstofan starfar náið með öllum ferða- og menningarmálafulltrúum á Austurlandi, sveitarfélögunum, öðrum hagsmunaðilum en fyrst og fremst með á annað hundrað ferðaþjónustufyrirtækjum á Austurlandi.
Þann 1. júní 2012 rann starfsemi Markaðsstofu Austurlands inn í Austurbrú.ses
Austurbrú er sjálfseignarstofnun stofnuð á grunni Þekkingarnets Austurlands, Þróunarfélags Austurlands, Markaðsstofu Austurlands og Menningarráðs Austurlands og annast auk þess daglegan rekstur Sambands sveitarfélaga á Austurlandi. Stofnunin er með sex starfsstöðvar á Austurlandi og yfir 20 starfsmenn. Tilgangur stofnunarinnar er að vinna að hagsmunamálum íbúa, sveitarfélaga, stofnana og fyrirtækja á Austurlandi og veita samræmda og þverfaglega þjónustu tengda atvinnulífi, menntun og menningu. Stofnunin verður í forsvari fyrir þróun atvinnulífs, samfélags, stjórnsýslu, háskólanáms, símenntunar, rannsókna, þekkingar- og menningarstarfs á Austurlandi.
Helstu markmið á sviði markaðsmála:
1. Að styrkja ímynd Austurlands í hugum ferðamanna.
2. Að annast markaðssetningu og kynningu á Austurlandi sem áfangastað ferðamanna bæði innanlands og utan.
3. Að kynna Austurland með öflugri heimasíðu, útgáfu og dreifingu bæklinga.
4. Að kynna möguleika fyrir ferðamenn með þátttöku í sýningum og öðru markaðsstarfi innanlands og utan í samstarfi við lykilaðila.
5. Að annast stjórnun og markaðssetningu sameiginlegra viðburða.
6. Að safna upplýsingum og halda utan um gagnagrunn um ferðaþjónustu á Austurlandi, vísa viðskiptum til ferðaþjónustuaðila eftir sérsviðum og geta mögulega boðið bókunarþjónustu fyrir ferðaþjónustuaðila á svæðinu.
7. Að samræma markaðsstarf í ferðaþjónustu á Austurlandi m.a. með liðsinni og ráðgjöf við ferðaþjónustuaðila og sveitarfélög á svæðinu.
8. Að vera leiðandi í stefnumótun í ferðamálum
9. Að hvetja til nýsköpunar og vöruþróunar í ferðaþjónustu á svæðinu m.a með þátttöku í ýmsum samstarfsverkefnum
10. Að veita aðilum Markaðsstofunar ráðgjöf við umsóknir í sjóði.
11. Að hvetja til og standa fyrir námskeiðum fyrir stjórnendur og starfsfólk í ferðaþjónustu á ýmsum sviðum sem snerta innviði ferðaþjónustunnar.
12. Að vera málssvari og vettvangur umræðu og samstarfs í ferðaþjónustu á Austurlandi.
Markaðsstofa Austurlands er opin alla virka daga frá kl. 9 - 17.
